يوم ما اتولد و هو بيدق لأسباب كتير . في الأول كان بيدق علشان يعيش . و بعدين اتعلم مع كل انفعال جديد نوع من الدق جديد .
لكن اول مرة فيها حس بحبك ليه … دق !!!
اول مرة فهم انك بتخاف عليه … رق !!!
اول مرة شاف دمع عينيك لما شفت الخطر حواليه …
يومها داق قلبي دق من نوع جديد …
دق دقه خلت كل كياني سعيد …
كانت اول مرة يدق بحب !
اول مرة يعرف … معني كلمة قلب !
كان المفروض انه يجري عليك ،
يترمي في حضن ايديك ،
يمسح الدمع اللي سببه لعنيك ،
يعتذر عن غلطه فيك .
لكن قلبي غير كل القلوب ،
لما يتحب يتفنن في جرح المحبوب .
دا مش غرور منه و لا كبرياء ،
و لا تنطيط و لا استعلاء ،
في كلمة واحدة بس …
دا مجرد غباء .
قلبي سافر و اتغرب ، بعد عنك كتير
حب ناس أخلصلهم … استعملوه عبد اجير
و اتعلم من الدق نوع جديد …
اتعلم يدق بالألم ، لما الناس بقسوة قلوبهم يخونوه .
و اتعلم يدق لما يخاف ، ان الناس في الغلط يشوفوه .
و اتعلم يدق لما يخاف ، انه يخسر اللي بيحبهم و بيحبوه
و اتعلم يدق من كتر حبه للمال …
و لو خسره ممكن يقف في الحال !.
انواع دق كتير لكن في الحقيقة …
هي دقة قلب قلقان
قلب مش حاسس بأمان
خايف من غدر الزمان
و نستغرب ليه ؟؟؟ دي طبيعة قلب الانسان !!!
ايه الحكاية … هو نسي و لا ايه ؟؟؟
احساسه يوم ما شاف دمعة عينيك ،
لما حس بالدفا من لمسة ايديك ،
احساسه باللذة والمتعة في احضانك بين ذراعيك .
يبدو و علي ما أظن انه لسه مانساش .
لكن اللحظات دي عدت علي قلبي كتير .
بافتكرك ، و اندم ، و ارجع ، و انا عارف انه مش ندم أخير .
دا طبعي و مش جديد عليك .
دا انت اللي خلقتني … انت عارفني انا صنع يديك .
لكن لو وقفت قدامك تحاسبني قبل ما ارجع ليك …
افتكر ان قلبي، حتي في عز شره … كان بينبض بحبه ليك
السبت مايو 05, 2012 2:01 pm